رسالة إلى طيور الظلام….. جنود الرومان وكهنة الهيكل
لن نمنحكم استسلامنا ويأسنا… لن يبقى المسيح في قبره أبدًا
اللاهوت السياسي لاهوت يرى ما أبعد من الوضع الحالي. يبحث فيما أبعد من الخلاص السياسي والاقتصادي والاجتماعي فقط (مهم ولكن مش بس ده). يبحث اللاهوت السياسي في الخلاص الشامل.
لقد انتفض الشعب وثار في ٢٥ يناير ونجح لأنّ قوى أخرى أرادت النجاح. ولأنّ قوى الاحتلال الداخلي وجنود الرومان وقوى الظلام العالمي “شافت ان النظام القديم كفاياه كده”.
الآن، فيه ناس تانيه عندها استعداد تبيع اكتر وتدي اكتر وتوافق اكتر.
ايه دا؟ ممكن يبيعوا الارض؟ اه ممكن الارض. والشعب مش هيفتح بقه واللي يفتح بقه المحكمه محكمتنا والشرطة شرطتنا.
وتتباع الجزيرتين وسط خنوع وصمت الجميع.
التنازل بداية تنازلات وسيصمت الجميع.
فاللعبة في أيد أقوى دولتين أمريكا وإسرائيل، مع عسكر الرومان اللي بيضمنه سلطتهم طالما دول راضيين عنهم.
الشعب لسه مغفل؟ خانع؟ مايع؟ جبان؟ تمام يا باشا انا قلت لك كله تحت ايدي شعب اللاوي اعتمادي، ممشيها على ربنا، وبيبوس البيادة، طول عمره ماشي جنب الحيط. ارض ايه ووطنية ايه واستعمار من القوى الداخليه اللي هي مستعمره من القوى الخارجيه ايه. دول بس بيتحمقوا ويسترجلو علي بنت لبست قصير، علي كنيسة اتبنت، علي ولد حضن بنت في جنينته وهي موافقه وبتحبه. لكن يتحرش بيها غصب عنها في مترو؟ لا عادي انا مالي مشفتش. هي لبسه وحش.
خلاص يبقي فل زي ما اتعلم يعمى ويخرس لما يشوف بنت حد بيتحرش بيها في مترو يبقى عادي نغتصب الارض. الجزر بالونة تجارب. وبكره جزء من سينا. المهم اللي يدفع واللي يضمن لجنود الرومان الحكم.
انا شيرت بوست كله يأس صحيح من ساعتين. لكن لا. اليأس ده هو شي فينا كبشر. لكن اليأس ده هو افضل هدية نقدمكه لكهنة المعبد وجنود الرومان. لا ولا. الكلمة الأخيرة مش ممكن تكون ليكم مش ممكن تكون لسلاحكم. انتو اجبن واضعف من اننا نخاف. مش هنديكم اللي عاوزينة. اننا نيأس. المسيح اتحاكم قدام قضاتكم. صحيح. اتنفذ فيه حكم الإعدام صحيح. واتدفن في ارضها صحيح. لكنه قام. وداس عليكم كلكم.
اراضينا هترجع، وانتوا هتموتو. والتاريخ هيرميكوا في الزبالة. المسيح قام. وداس على اعمالكم وقراراتكم.
الشعب اللي جهلتوه في مدارسكو وسرطنتوه بمبيداتكم وجيبتوله فشل كلوي بميتكو وموتوه بانكم اشتريتو بفلوس دواه اسلحه، هيقوم وهيحقق العدالة مع القيامة.
اليأس خيانة. قام المسيح من القبر. سننتصر.