الليبرالية أو اللبرالية -من "līberālis" (ليبِرَالِس) اللاتينية وتعني "حر"- هي مذهب سياسي أو حركة وعي اجتماعي، تقوم على قيمتي الحرية والمساواة. تختلف تفسيرات الليبراليين لهذين المفهومين وينعكس ذلك على توجهاتهم، ولكن عموم الليبراليين يدعون في المجمل إلى دستورية الدولة، والديمقراطية، والانتخابات الحرة والعادلة، وحقوق الإنسان، وحرية الاعتقاد. ويمكن أن تتحرك الليبرالية وفق أخلاق المجتمع الذي يتبناها وقيمه، فتتكيف الليبرالية حسب ظروف كل مجتمع. الليبرالية أيضًا مذهب سياسي واقتصادي معًا؛ ففي السياسة تعني تلك الفلسفة التي تقوم على استقلال الفرد والتزام الحريات الشخصية وحماية الحريات السياسية والمدنية.
إيه يا عم وغوشتنا بالكلام الكبير ده....
بص يا سيدي الليبرالية يعني... : يعني تلاقيني بخالفك في الرأي، وتاني يوم تلاقيني جنبك في الميدان بتظاهر معاك لتمكينك من إبداء رأيك، إلي هوا مخالف ليا في الأساس!
هل الليبرالية يعني الـ"لا دين"؟
لا يا سيدي، الليبراليين اللى بيعتنقوا الدين الإسلامى بيؤمنوا ان الليبرالية مش بتتعرض مع الإسلام و ان مبادىء الليبراليه نفسها ، الحرية، العدل ، المساوة ، احترام حقوق الانسان و حرية العقيدة و الاعتقاد ، موجوده فى الإسلام. بس بيرفضوا استخدام الدين لأغراض سياسيه و تحويل الأئمة و الشيوخ كسياسيين و بيشوفوا ان كده بيسبب اضرار للدين عشان المواقف و الافكار السياسيه ممكن تتغير فى اى وقت و ممكن تكون صح أو غلط و الدين المفروض انه ثابت و صحيح و لو تم استخدام الدين فى السياسه و بقى السياسى بيقول ان كلامه و افكاره هو كلام الدين ، كده بيمنع المناقشه أو الاعتراض على كلامه و المختلف معاه يبقى ضد الدين، و اذا كلامه طلع غلط و اتسبب فى مشاكل أو هو نفسه تورط فى افعال مش اخلاقيه الدين بيرفضها ، كده حيبان للناس ان الدين غلط ، و فى الحقيقه افكار السياسى هى اللى غلط و اتسببت فى المصايب مش الدين اللى بيقول انه بيقول كده. فى أئمة و شيوخ دعموا الافكار دى زى الأمام محمد عبده اللى بيعتبر من مؤسسى الفكر الليبرالى فى مصر و فى ناس بيعتبروه شيخ الليبراليين. على الناحية التانيه ، فى شيوخ من التيار الوهابى و السلفى بتقول ان الليبراليه ضد الدين و بتدعو للانحلال و الفساد و بتقول ان مينفعش ان يكون فيه ليبرالى مسلم و ان الدين لازم يتدخل فى السياسيه و بيستخدموا الدين لأغراض سياسيه و بيهاجموا الافكار الليبراليه و ساعات بتوصل لتكفيرهم.
هل الليبرالية فيها ديموقراطية؟
الليبراليه بتطالب و افكارها مشتركة مع الديموقراطيه ومن اشهر التيارات الليبراليه فى السياسية هى الديموقراطيه ليبراليه. الليبرالين بيطالبوا ان الناس لازم تعبر عن رائيها بمنتهى الحرية والوضوح و تختار طريقها ويحترم رائيها والاتجاه اللي تختاره الاغلبية في الانتخابات، صحابه همه اللي يمسكو السلطة ويديرو شئون البلاد لمدة محددة، ينعاد في آخرها الانتخابات، وأي تغيير في رأي الناس يغير الاتجاه صاحب الاغلبية على طول تتغير الحكومة وتكون الإدارة والسلطة في إيد الاتجاه الجديد أو تحالف الاتجاهات اللي خدت أغلبية أصوات الناخبين، وبالطريقة السلمية دي يتم نقل السلطة للأغلبية الجديدة اللي كانت أقلية في المرة السابقة، وفي بعض الحالات في البلاد اللي لسه مبادئ الديمقراطية جديدة ومابانتش بالتمام في وعي الناس، ممكن الانتخابات الديمقراطية الأولى تجيب ناس مش مع الديمقراطية لكن بيستغلوها على مايوصلو وبعدين يلغوها أو يحجموها بحيث يمنعوا انتقال السلطة منهم في المستقبل ويرجعو القوانين والدستور لأحد النظم الاستبدادية اللي كانت موجودة قبل عهود الديمقراطية، وفي الحالة دي بتتصرف الحكومة ضد الديمقراطية وضد الليبرالية وتبدأ في اضطهاد أصحاب العقائد الأخرى وأصحاب الافكار الأخرى وتمنع تاني أصحاب اي فكر جديد وتهدد بقتلهم. وفي الحالة دي بتكون انتكاسة للديمقراطية الوليدة وعودة للاستبداد اللي الناس لسه متعودة عليه من مئات السنين، ولازم الناس تبتدي من جديد تسعى تاني عشان تحقق الديمقراطية والليبرالية. بعض الليبراليين بيعتقد انه لما تتحقق الديمقراطية والليبرالية بالكامل، فمش ممكن تيجي أي أغلبية تؤيد اضطهاد أي أقلية، لأن الاضطهاد مش موجود إلا في الافكار الاستبدادية والإرهابية، ولما الناس هاتوعي لمعنى الديمقراطية والليبرالية بصحيح ويكون كل الناس احرار في التفكير والتعبير بصحيح، فالأفكار الإرهابية والاستبدادية هاتكون انهارت من تلقاء نفسها ، لأن أفكار الاستبداد والإرهاب ماتقدرس تقف صامدة أو قوية قدام حرية الحوار وحرية الانتقاد. والدليل على كدا ان المستبدين والارهابيين دايما مابيسمحوش بحرية التفكير والتعبير ومابيعترفوش بالحوار وبيهددو دايما بالقتل اللي مايشهدشي معاهم بصحة وصدق وصواب وكمال أفكارهم، ودا بيدل على انهم- الاستبداديين والارهابيين نفسهم- واعيين بخطر الحرية على بقاء أفكارهم، خصوصا أفكارهم غير المنطقية وغير العقلانية وغير الانسانية.
هل لليبرالية أي خبرات سياسية في مصر؟
حزب الوفد اللى كان موجود لحد 1952
حزب الغد
حزب الجبهة الديموقراطيه
الحزب المصرى الليبرالى(تحت التائسيس)
حركة شباب 6 ابريل
الحركة المصرية من اجل التغير ( حركة كفايه)
حركات و جميعات حقوق الانسان و المجتمع المدنى
طب في شيوخ ... مقتنعين إن الليبرالية مش كفر؟
فيه.... الشيخ: محمد عبده (إضغط علي الاسم لمعلومات أكثر) و الشيخ: آية الله الشيخ إياد الركابي(إضغط علي الاسم لمعلومات أكثر)