Ahmed Al-Yazdi
جنّا راضين بالكوليرا
و الديزانتري و الزحار
جنا راضين بالملاريا
نرجف إحنه و الجسم حار
من نريد بالنهر نسبح
جانت بلهارزيا الخيار
حصبة جتنا.. جدري جانه
و النكاف هم عدنا صار
تيفو الملعون إجانه
موّت الكبار و الزِغار
بس طلع مايسين كالو
كِطَعه بليلُ و نهار
و إجت أمراض ما عِرفنه
و إنمحت من الوكت دار
نطلع و ندخل بكفينه
و المرض بالناس سار
أشو من جتنه الكورونا
إنعزلنا السابع جار
كالو إكعد إنته ببيتك
هاذه قانون هوّه صار
أنته ممنوع تمشي برّه
و تنعدي و تشتم غبار
من رذاذ الغير ماشي
كبلك بالشارع هوّه مار
ها غرامة و حبس بيها
هذا قانون و قرار
كلت مو تصيبني الكئابة
و يجوز أموت بالإنتحار
كالو موت مايهمنه إحنة
و راح نحسبك علّي صار
و راح يزيد العدد عدنه
و نخوّف الناس الكبار
و كّفوا الشغل و فلّس
أبو المطعم و أبو البار
وأبو الدكان الزغيّر
كام يلطم و يشم غبار
و الأشغال البقية
كلها هم صابها الدمار
أخذ كل واحد ينظِّر
و يعتقد عنده ألأسرار
واحد يكول هايه لعبة
و واحد يكول صح القرار
ألله يعلم شنو القصة
بالأخير عنده القرار
و نرضى إحنه باليصير
و نرضى إحنا باللي صار